Óásættanleg framkoma forseta Alþingis

Ásta Ragnheiður Jóhannesdóttir forseti Alþingis.
Ásta Ragnheiður Jóhannesdóttir forseti Alþingis. mbl.is/Kristinn
Sigmundur Davíð Gunnlaugsson, formaður Framsóknarflokksins, segir framkomu Ástu Ragnheiðar Jóhannesdóttur, forseta Alþingis, á Alþingi í dag óásættanlega. Þá sló Ásta ótæpilega oft á bjöllu sína og rak þingmanninum úr ræðustól. Þingflokkur Framsóknarflokksins mun funda með forsetanum á næstunni.

Sigmundur kvaddi sér hljóðs undir liðnum fundarstjórn forseta á Alþingi í dag. Ásta Ragnheiður taldi, þegar nokkuð var liðið á ræðu Sigmundar, að hann væri alls ekki að ræða um fundarstjórn sína og barði stanslaust í bjöllu sína þar til hann yfirgaf ræðustól.

Sigmundur segir slíkan einleik á bjölluna fáheyrðan. Árum og jafnvel áratugum saman hafi þingmenn tjáð sig undir liðnum fundarstjórn forseta. Hann segir sjálfstæðismenn m.a. hafa nýtt sér þetta mörg hundruð sinnum á síðasta þingi.

Eftir að Sigmundur var hrakinn úr ræðustól undir bjölluhljóm kom Höskuldur Þórhallsson, þingmaður Framsóknarflokks, í ræðustól, mótmælti framkomu forseta Alþingis og krafðist þess að þingflokkur Framsóknarflokks fengi fund með forsetanum.

Sá fundur hefur ekki farið fram en verður væntanlega í þessari viku. Þar mun Sigmundur koma sínum skoðunum á framfæri.
Sigmundur Davíð Gunnlaugsson.
Sigmundur Davíð Gunnlaugsson.
mbl.is

Bloggað um fréttina