Innlent | mbl | 11.10.2010 | 12:27

„Þetta eru ekki samráðsfundir“

Oddvitar ríkisstjórnarinnar, Steingrímur J. Sigfússon, fjármálaráðherra og Jóhanna Sigurðardóttir, forsætisráðherra mbl.is/Ernir Eyjólfsson

Fundi um skuldavanda heimilanna lauk rétt fyrir hádegi. Fulltrúi Framsóknarflokks segir lítinn árangur hafa orðið af fundinum.

Gunnar Bragi Sveinsson, þingflokksformaður Framsóknar, sem var á fundinum, segist ekki líta á þessa fundi sem samráðsfundi. „Við erum á þessum fundum sem áheyrnarfulltrúar. Það ætti fremur að kalla fundina upplýsingafundi fyrir stjórnarandstöðuna. Samráð hlýtur að vera þannig að tillögur allra aðila fá að koma upp á borðið. En við munum halda áfram að mæta á þá til að fá að vita hvað er að gerast.“

Spurður að því hvers vegna fulltrúi Framsóknarflokksins hefði mætt svona seint á fundinn sagði Gunnar að fundarboðið hefði verið sent í tölvupósti og enginn tekið eftir því. Í lok fundarins í dag hefði þess verið gætt að boða til næsta fundar, en hann verður næstkomandi miðvikudag klukkan hálf ellefu.