Samanlagt tap þeirra sem höfðuðu, án árangurs, mál gegn Landsbankanum og Landsvaka vegna rýrnunar á peningamarkssjóði Landsbankans nam samtals tæplega 300 milljónum króna.
Miðað við að útgreiðsluhlutfall sjóðsins var 68,8% námu innistæður þessa hóps tæplega 955 milljónum króna.
Alls voru höfðuð mál af hálfu 30 einstaklinga og fjögurra einkahlutafélaga sem áttu hlut í fjárfestingarsjóðnum Peningabréf Landsbankans ISK. Tjón tveggja einstaklinga var sýnu mest en hvor um sig töpuðu þeir 44 og 47 milljónum króna. Inneign þeirra nam samtals 295 milljónum króna.
Fjórir töpuðu á bilinu 20-24 milljónum króna og jafnmargir 10-18 milljónum króna. Átta töpuðu minna en einni milljón króna og tólf töpuðu á bilinu 1-10 milljónum króna, að því er fram kemur í Morgunblaðinu í dag.