Andlát: Þorkell Sigurbjörnsson

Þorkell Sigurbjörnsson.
Þorkell Sigurbjörnsson. mbl.is/Golli

Þorkell Sigurbjörnsson tónskáld lést í gær, 30. janúar, á líknardeild Landspítalans í Kópavogi, 74 ára að aldri. Þorkell var fæddur 16. júlí 1938, eitt átta barna biskupshjónanna Magneu Þorkelsdóttur og dr. Sigurbjörns Einarssonar.

Þorkell hóf snemma nám við Tónlistarskólann í Reykjavik en eftir stúdentspróf frá MR 1957 hóf hann nám í tónsmiðum við Hamline-háskólann í Minnesota og síðan við Illinois-háskólann þaðan sem hann lauk meistaraprófi 1961. Sama ár kom hann heim og hóf störf við Tónlistarskólann í Reykjavík og kenndi þar allan starfsaldur sinn. Kenndi einnig í Listaháskólanum er hann var stofnaður. Hann var félagi í konunglegu sænsku tónlistarakademíunni og heiðursdoktor frá Hamline-háskólanum

Þorkell samdi  rúmlega 300 tónverk, og mörg þeirra hafa verið gefin út á nótum og á hljómplötum. Meðal þeirra eru hljómsveitarverk, kammerverk, einleikskonsertar, barnaóperur , kammerópera  sem og raf- og tölvutónlist að ógleymdum  fjölda sálmalaga sem  sannarlega hafa náð eyrum þjóðarinnar

Hann var formaður Tónskáldafélags Íslands um árabil, formaður Musica Nova 1964 - 67 og forseti Bandalags íslenskra listamanna 1982 - 86 Hann var framkvæmdastjóri  og  stjórnarmaður Listahátíðar í Reykjavik um  skeið. Hann var einn stofnenda  og stjórnarformaður Íslenskrar tónverkamiðstöðvar 1968 -81. Hann var í stjórn STEFs um langt árabil

Hann var dagskrárfulltrúi  hjá RÚV fyrr á árum en annaðist tónlistarþætti þar um 30 ára skeið, m.a hinn langlífa þátt Tómlist á atómöld.

Þorkell kvæntist Barböru Jane Powell á jólum 1959, en hún var um langt skeið skólastjóri skóla bandaríska sendiráðsins í Reykjavík. Börn þeirra eru: Mist Barbara, tónskáld og deildarforseti tónlistardeildar Listaháskólans, og Sigurbjörn verkfræðingur, einn stjórnenda Barclay's banka í London. Barnabörnin eru átta og eitt barnabarnabarn.

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »