Tölvufyrirtækið CCP hyggst reisa útilistaverk eftir listamanninn Sigurð Guðmundsson á hafnarsvæðinu í tilefni af tíu ára afmæli netleiksins vinsæla EVE Online.
Eldar Ástþórsson, upplýsingafulltrúi CCP, segir í samtali við mbl.is að listaverkið, sem heitir Heimar í heimi, verði sett upp á hafnarkantinum við Rastargötu í Vesturbugt, rétt hjá höfuðstöðvum fyrirtækisins.
„Við erum auðvitað mjög ánægð að þetta sé komið í höfn. Nú erum við búin að tilkynna það á alþjóðavettvangi að listaverkið muni rísa í Reykjavík og nú þegar hefur það vakið mikla og góða athygli. Það er bara mjög ánægjulegt,“ segir Eldar.
Verkið er fimm metrar á hæð og verða nöfn um 500 þúsund áskrifenda leiksins letruð á það. Eldar segir að það sé hluti af listsköpuninni, þar sem verkið heiti Heimar í heimi.
„Þetta er mjög skemmtilegt samspil milli þessa raunheims sem við búum í og þessa sýndarheims, sem er EVE heimurinn. Milljónir manna hafa tengst heiminum síðustu tíu ár og hundruðir þúsunda um allan heim spila leikinn í dag,“ útskýrir hann.
„Síðan er þá komin ástæða fyrir þá sem hafa einhvern tímann spilað EVE leikinn, eða spila hann í dag, að koma til Reykjavíkur og sjá verkið.“
Reykjavíkurborg hafnaði fyrstu hugmynd listamannsins að listaverkinu. Það var sex metrar á hæð, gul bronsmynd af konu að leika á fiðlu fyrir framan turn sem einnig var úr bronsi. Hafþór Yngvason, safnstjóri Listasafns Reykjavíkur, sagði í umsögn sinni um verkið að það hefði engin tengsl við sögu svæðisins og náttúruleg einkenni þess.
Listamaðurinn kom þá með nýja hugmynd sem nefndist Heimar í heimi. Hafþór var ánægður með þá hugmynd og hvatti borgaryfirvöld til að finna verkinu varanlegan stað við höfnina.
Menningar- og ferðamálanefnd Reykjavíkurborgar lýsti ánægju sinni með verkið og vísaði umhverfis- og skipulagsráð því til umsagnar hjá skipulagsfulltrúa borgarinnar.
Hann gaf grænt ljós á það og lagði til að það fengi að standa í tvö ár, eða til 1. maí árið 2016.
- Hvað tekur við eftir það?
„Við vitum það í rauninni ekki,“ segir Eldar. „Það er talað um að það verði í að minnsta kosti tvö ár á þessum stað. Hvort það verður eitthvað lengur þar eða að fundinn verði annar staður í borginni, það verður bara að fá að koma í ljós. Það er ekki í okkar höndum, þannig séð,“ segir hann.
Til stendur að afhjúpa listaverkið 30. apríl næstkomandi, daginn áður en hin árlega EVE Fanfest hátíð CCP hefst.