Enginn fundur boðaður
Ríkissáttasemjari hefur ekki boðað til næsta fundar deiluaðila um kjör tónlistarkennara samkvæmt Sigrúnu Grendal, formanns Félags tónlistarkennara. Verkfall um 550 tónlistarkennara í tónlistarskólum landsins hófst í morgun en Sigrún segir verkfallið einnig hafa áhrif í grunn- og framhaldsskólum.
„Það er mjög ánægjulegt að samstarf milli tónlistarskóla og annarra skóla sé að aukast og það sýnir mikilvægi tónlistarmenntunar í samfélaginu. Við höfum fengið margar fyrirspurnir vegna slíkra verkefna sem núna eru í uppnámi því þar þurfa tónlistarkennararnir að draga sig út,“ segir Sigrún.
„Ef marka má rödd foreldra á fundinum í gær þá er skilningur á mikilvægi tónlistarskóla að aukast,“ segir Sigrún og bætir við að stuðningur foreldra hafi fyllt hana eldmóði.
„Stjórnvöld þurfa að hugsa upp á nýtt sýna nálgun. Frá mér séð erum við sammála um stefnuna en aðferðarfræðin er ólík. Okkar aðferðarfræði er nær eðli tónlistarinnar, sveigjanleg og skapandi en nálgun stjórnvalda er meira bundin í Excel og það gengur illa upp í þessu starfsumhverfi,“ segir hún.
Sigrún segist bjartsýn á að málstaður tónlistarkennara nái eyrum yfirvalda og að hún bíði spennt eftir fundarboði ríkissáttasemjara.
Ekki allir í verkfalli
Sigrún tekur fram að verkfallið nær ekki til hefðbundinnar tónlistarkennslu í grunn- og framhaldsskólum. Verkfallið mun ekki hafa áhrif á kórastarf í kirkjum og öðrum vettvangi utan tónlistarskólanna auk þess sem vert er að muna að ekki allir tónlistarkennarar landsins eru félagsmenn í Félagi tónlistarkennara.
Í Skessuhorni greinir t.a.m. frá því að fjórir tónlistarkennaranna við Tónlistarskóla Akraness séu ekki í Félagi tónlistarkennara heldur í Félagi íslenskra tónlistarmanna og muni því halda áfram kennslu samkvæmt stundarskrá. Í tilkynningu segir Lárus sighvatsson skólastjóri skólans að hann vonist til þess að vinnustöðvunin verði stutt og að samningar um sambærileg kjör tónlistarkennara við aðrar kennarastéttir náist fljótt.
/frimg/1/4/15/1041586.jpg "Dóra Magnúsdóttir.")
