Vika er nú liðin frá því að verkfall félaga í Félagi tónlistarskólakennara hófst. Af því tilefni var efnt til kröfugöngu og fjölmenntu félagsmenn mjög.
Hópurinn kom saman við Skólavörðuholt og var því næst gengið niður Skólavörðustíg þaðan sem stefnan var tekin á Austurvöll.
Þeir vegfarendur sem leið áttu um miðbæ Reykjavíkur tóku vafalaust eftir hópnum, enda báru félagsmenn kröfuskilti og spiluðu á hljóðfæri af miklum móð.
Vegna verkfallsins hafa fjölmargir nemendur við tónlistarskóla landsins misst af tónlistartímum þessa viku og hafa ýmsir velt því fyrir sér hvort þeir fái tímana bætta enda í flestum tilvikum greitt fyrirfram fyrir önnina að hausti.
Formaður Félags tónlistarkennara, Sigrún Grendal, sagði í viðtali við mbl.is fyrr í dag það vera í höndum hvers rekstraraðila að ákveða hvort nemendur fái bætta þá tíma sem þeir missa af vegna verkfallsins.