Sprengjusérfræðingar Landhelgisgæslunnar tóku myndskeið af því þegar þeir sprengdu tundurdufl í Álftafirði í fyrradag. Hvellurinn bergmálaði þrisvar í fjöllunum og stór gígur myndaðist í fjörusandinum en ekki er óalgengt að tundurdufl finnist á þessum slóðum.
Fjallað var um málið í Morgunblaðinu í morgun en að sögn Sigurðar Ásgrímssonar, sprengjusérfræðings, hefur tundurduflið líklega legið í sandinum í fjörunni lengi. Jafnvel um áratugaskeið en það er að öllum líkindum frá því í síðari heimsstyrjöldinni þegar mikið magn af tundurduflum var dreift í hafið umhverfis landið.
Mikilvægt er að fólk hafi varann á sér rekist það á tundurdufl og láti Landhelgisgæsluna vita.