Landhelgisgæslan fékk greiddar 27,5 milljónir króna fyrir að draga flutningaskipið Hoffell til hafnar, en það varð vélarvana 10. janúar síðastliðinn um 160 sjómílur suðvestur af Færeyjum.
Varðskipið Þór var sent á vettvang og kom með skipið í taug til Reykjavíkur fimm dögum síðar.
Fram kom í Morgunblaðinu á mánudag að Samskip leitaði tilboða í verkið og ákvað í framhaldinu að ganga til samninga við Landhelgisgæsluna. Blaðið fékk afrit af samningnum eftir að lögmaður hennar komst að þeirri niðurstöðu að beiðni blaðsins um aðgang að honum félli undir upplýsingarétt á grundvelli upplýsingalaga.