Vilborg á toppi veraldar

Vilborg Arna Gissurardóttir.
Vilborg Arna Gissurardóttir. Ljósmynd/Vilborg Arna Gissurardóttir/Instagram

Vilborg Arna Gissurardóttir komst í nótt á topp Everest-fjalls og varð þar með sjöundi Íslendingurinn sem nær þessum merka áfanga. Hún komst á tindinn um klukkan 03:15 í nótt að íslenskum tíma en gangan frá fjórðu búðum á tindinn tók ellefu klukkustundir.

„Þetta hafðist! Þau voru bara rétt í þessu að toppa,“ sagði Tómasz Þór Veruson, kærasti Vilborgar Örnu, í samtali við mbl.is. Hann er staddur á Íslandi en hefur fylgst grannt með framvindu mála í nótt.

„Henni líður mjög vel og þetta gekk alveg ótrúlega vel. Þau voru slétta ellefu tíma upp. Náðu toppnum þá korter yfir þrjú að íslenskum tíma,“ segir hann ennfremur.

Everest-fjall er hæsta fjall í heimi, 8.848 metra hátt.

Geðveikt útsýni

Tómasz segir að það hafi verið mjög hvasst á fjallinu og töluverð umferð annarra fjallgöngumanna, en hann telur að um það bil 30 til 40 aðrir hafi verið að komast á tindinn á sama tíma. Að öðru leyti hafi allt gengið mjög vel.

Vilborg og sjerpinn Tenji gátu verið á toppi Everest í nokkrar mínútur áður en þau ákváðu að halda aftur niður, enda þurfi að taka umferðina með í reikninginn auk þess sem það sé töluvert hvasst. „Hún fékk að njóta útsýnisins og sagði að þetta væri geðveikt,“ segir Tómasz og hlær.

Tekur tvo daga að komast í grunnbúðirnar

Það ætti að taka um sex klukkustundir fyrir Vilborgu að komast aftur niður í fjórðu búðir Everest, eða um klukkan 9 eða 10 að íslenskum tíma. Svo mun það taka um tvo daga að komast alla leið niður í grunnbúðirnar. Á meðan er hún ekki í sambandi við neinn annan en Tómasz.

Vilborg komin í fámennan hóp íslenskra afreksmanna

Sem fyrr segir er Vilborg komin í hóp fárra Íslendinga sem hafa náð að komast á hæsta tind í heimi. Hún er jafnframt fyrsta íslenska konan sem afrekar þetta. Þetta var þriðja tilraun hennar til að sigrast á Everest.

Vilborg lagði af stað á toppinn frá fjórðu búðum fjallsins síðdegis á föstudag en varð frá að hverfa í fyrrinótt sökum veðurs. Hún lagði svo aftur af stað frá fjórðu búðunum síðdegis í gær og komst á leiðarenda klukkan 03:15, eins og fram hefur komið.

Í dag, 21. maí, eru 20 ár liðin frá því að Íslendingar stóðu fyrst á tindi Everest-fjalls. Fjallgöngukapparnir Björn Ólafsson, Einar K. Stefánsson og Hallgrímur Magnússon unnu það afrek.

Haraldur Örn Ólafsson gekk næstur Íslendinga á þetta hæsta fjall heims og stóð á tindi Everest 16. maí 2002. Tveir Íslendingar gengu á Everest vorið 2013. Ingólfur Geir Gissurarson náði tindinum 21. maí. Hann stóð þá á fimmtugu og var elsti Íslendingurinn og eini íslenski afinn sem hafði gengið á hæsta fjall heims.

Leifur Örn Svavarsson náði tindi Everest 23. maí. Hann er eini Íslendingurinn sem hefur farið norðurleiðina á Everest, en hún er tæknilega erfiðari en suðurleiðin.

mbl.is

Bloggað um fréttina