Leka lögnin sem flæddi úr í Vesturbænum fyrr í dag er fundin en hún reyndist vera undir Hringbraut. Mest af heita vatninu kom aftur á móti upp á horni Kaplaskjólsvegar og Víðimels og í nálægum brunnum að því er fram kemur í tilkynningu frá Veitum.
Æðin hefur verið einöngruð með því að loka fyrir streymi beggja vegna við hana og hefur sú aðgerð ekki áhrif á afhendingu heits vatns til íbúa. Því ættu allir að vera komnir með heitt vatn en nokkra stund tekur að ná upp fullum þrýstingi á öllu svæðinu segir í tilkynningunni.
Fyrstu fregnir í dag gáfu til kynna að nokkurt tjón hefði orðið þegar heitt vatn flæddi í kjallara í grennd við bilunina en svo virðist sem þær hafi ekki reynst á rökum reistar. Enn sem komið er hafa engar beiðnir um aðstoð við dælingu borist slökkviliði og enginn hefur slasast.