Þingflokkar flokkanna þriggja sem staðið hafa í stjórnarmyndunarviðræðum koma nú saman í Alþingishúsinu hver til síns fundar, þar sem formenn flokkanna kynna fyrirhugaðan stjórnarsáttmála. Fundur sjálfstæðismanna hófst klukkan 13, en vinstri græn og framsóknarmenn koma saman klukkan 13.30.
Formenn flokkanna þriggja, þau Katrín Jakobsdóttir, Bjarni Benediktsson og Sigurður Ingi Jóhannsson, funduðu með formönnum annarra flokka á Alþingi klukkan 12 í dag, en þeim fundi verður fram haldið klukkan 15. Verður þar farið yfir störf þingsins framundan.
Flokksstofnanir VG, Sjálfstæðisflokks og Framsóknar hafa verið boðaðar til fundar á miðvikudaginn þar sem stjórnarsáttmáli fyrirhugaðrar ríkisstjórnar verður lagður fram. Þetta sagði Katrín Jakobsdóttir, formaður Vinstrihreyfingarinnar – græns framboðs, í samtali við mbl.is í dag.
Þá sagði hún að nú þyrfti bara að ræða ráðuneytaskiptingu, en gengið er út frá því að hún verði forsætisráðherra. Þá sagði Katrín fyrr í dag að yrði stjórnarsáttmálinn samþykktur í flokksstofnunum flokkanna á miðvikudag gæti þingið komið saman fljótlega upp úr því.