Atkvæðagreiðsla um nýjan kjarasamning Flugvirkjafélags Íslands við Icelandair hefst á miðnætti en þetta staðfestir Óskar Einarsson, formaður Flugvirkjafélags Íslands, í samtali við mbl.is.
Samningurinn var kynntur félagsmönnum í kvöld en um 150 félagsmenn voru á fundinum.
Aðspurður telur Óskar að menn hafi tekið vel í kynninguna á samningnum. „Þeir tóku nokkuð vel í þetta held ég,“ segir Óskar.
Atkvæðagreiðslan hefst á miðnætti og lýkur 28. desember. „Hún mallar yfir jólin,“ segir Óskar og bætir við að menn geti melt samninginn og jólamatinn á sama tíma.
Óskar sagði í gær að flugvirkjar hefðu komist langleiðina með að ná fram þeirri leiðréttingu sem þeir fóru fram á í kjarasamningnum sem var undirritaður við Samtök atvinnulífsins aðfaranótt þriðjudags vegna Icelandair.