Sérfræðingar Vinnumálastofnunar spá 2.500-3.000 nýjum störfum í ár. Gangi það eftir munu hafa orðið til allt að 29.300 störf á sjö árum.
Karl Sigurðsson, sérfræðingur hjá Vinnumálastofnun, telur sennilegt að það sé Íslandsmet. Það hafi aldrei áður orðið til jafn mörg störf á Íslandi á svo fáum árum.
Til samanburðar horfir hann til uppgangstímans 1984-87 og um aldamótin, áður en netbólan sprakk. Þá hafi orðið til fjöldi starfa á fáum árum. Eftir fyrri uppsveiflur hafi komið niðursveifla með fækkun starfa. Slíkt virðist hins vegar ekki í kortunum nú.