„Ég ætla að ræða um vinnumarkaðinn, lífeyriskerfin og lífeyrisréttindin og stöðuna hér á landi til samanburðar við önnur lönd,“ segir Ari Skúlason, hagfræðingur Landsbankans, um erindi sitt á fundi um langlífi og samfélagsbreytingar sem Landsbankinn og Landssamband eldri borgara, í samvinnu við Félag eldri borgara í Reykjavík, heldur í sal Félags eldri borgara í Reykjavík í Stangarhyl 4 kl. 16-17 í dag.
Hugmyndin að fundinum er aðallega sú að efna til umræðu og skoða ýmsa fleti á málum eldri borgara. Erindi Ara nefnist: Eldra fólk er unglingar nútímans — samfélagsbreytingar vegna hækkandi meðalaldurs. Erindið byggir á fimm greinum sem hann hefur skrifað um þetta málefni og hafa birst á vefsíðu Landsbankans sem hafa mælst vel fyrir.
Ari bendir á að þrátt fyrir að hér á landi sé sterkt lífeyriskerfi sé hópur eldri borgara sem stendur ekki sérstaklega vel. Sá hópur mælist undir meðaltalinu á greiðslum úr lífeyrissjóði. Hins vegar er hópurinn fjölbreyttur. Þeir sem standa vel yfir meðaltali eru einstaklingar sem hafa til dæmis starfað sem þingmenn, ráðherrar, hæstaréttardómarar eða í sambærilegum störfum.
„Af því að við erum með firnasterkt vinnumarkaðs lífeyriskerfi þá sleppur hið opinbera hér nokkuð vel við að borga lífeyri. Við borgum miklu lægra hlutfall af opinberum útgjöldum í lífeyri en flestar þjóðir í Evrópu. Það má segja sem svo að við hefðum alveg efni á að laga gallana á kerfinu eins og það er núna,“ segir Ari.
Tvö önnur lönd, Danmörk og Holland, eru með sterkara lífeyriskerfi að sögn Ara.
Á fundinum heldur Sigríður J. Guðmundsdóttir, formaður Félags eldri borgara Selfossi, einnig erindi sem nefnist: Af lágum launum á lítil eftirlaun — reynslusaga.
Allir eru velkomnir.