Ríkissaksóknari hefur staðfest niðurstöðu héraðssaksóknara um niðurfellingu skattamála sem héraðssaksóknari hafði til skoðunar og hafði fellt niður. Málin voru felld niður eftir að Mannréttindadómstóll Evrópu kvað upp dóm sinn í máli Jóns Ásgeirs Jóhannessonar og Tryggva Jónssonar frá því í maí í fyrra þar sem tekist var á um tvöfalda refsingu.
Eftir að héraðssaksóknari felldi niður 62 af þeim 150 skattamálum sem embættið var með til rannsóknar ákvað embætti skattrannsóknarstjóra að kæra ákvörðunina í tengslum við sex málanna til ríkissaksóknara. Ákvörðun ríkissaksóknara lá svo fyrir fyrr í vikunni, en Helgi Magnús Gunnarsson vararíkissaksóknari staðfestir málalokin við mbl.is.
Í nóvember var greint nánar frá málunum 62 sem höfðu verið niðurfelld. Skattstofn þeirra nam samtals 9,7 milljörðum og var umfangsmesta málið upp á 2,2 milljarða, samkvæmt lista sem skattrannsóknarstjóri birti. Til viðbótar getur sekt í slíkum málum numið tvöfaldri og upp í tífalda upphæð vangoldinna skatta.
Málin tengjast meðal annars greiðslum frá erlendum félögum, vaxtatekjum, hlutabréfaviðskiptum, óheimilar úthlutunar frá lögaðila og vanframtalinna stjórnarlauna, auk vanframtalinna tekna.
Í máli Jóns Ásgeirs og Tryggva komst Mannréttindadómstóllinn að því að ekki væri hægt að refsa mönnum tvisvar fyrir sama mál, en fyrst hafði skattur verið endurákvarðaður auk álags á þá Jón Ásgeir og Tryggva vegna skattalagabrota tengdum Baugi og Gaumi. Síðar voru þeir dæmdir í skilorðsbundið fangelsi vegna málsins. Þannig var niðurstaða dómsins að þeir hefðu bæði hlotið refsingu frá skattinum og ákæruvaldinu sem byggðu á sama grunni.
Í nýju dómafordæmi Hæstaréttar í september þar sem byggt var á niðurstöðu Mannréttindadómstólsins var niðurstaðan að mynda þyrfti samþætta heild í málum sem þessum og var ákærði í málinu sakfelldur og sektaður til viðbótar við fyrri endurákvörðun. Hæstiréttur telur því tvöfalda refsingu ekki ólögmæta ef um samþætta heild málsins er að ræða.
Þegar ákvörðun héraðssaksóknara lá fyrir í nóvember sagði Bryndís Kristjánsdóttir skattrannsóknarstjóri að niðurstaðan að mál hafi verið felld niður sé fúl og „mikil blóðtaka.“
Hluti málanna kom upp eftir að embættið festi kaup á erlendum gögnum um meint skattaundanskot Íslendinga erlendis. Bryndís segir að þótt málin hafi verið felld niður hjá saksóknara, þá hafi kaup á gögnunum skilað talsverðu. Þannig hafi stór hluti málanna verið afgreiddur af ríkisskattstjóra og í flestum málum hafi verið skatturinn verið endurákveðinn. Það sé aftur á móti í tengslum við mögulega sekt og ákæru sem stór hluti geti verið glataður.
Ólafur Hauksson héraðssaksóknari sagði við mbl.is í dag að engar aðrar stærri ákvarðanir hefðu verið teknar varðandi niðurfellingu annarra skattamála sem embættið er með í rannsókn.