Sýslumaðurinn á höfuðborgarsvæðinu hefur hafnað kyrrsetningarkröfu Datacell og Sunshine Press Productions (SPP) á eignum Valitor.
Þetta kemur fram í tilkynningu frá Valitor.
„Ákvörðunin kemur ekki óvart enda telur Valitor að kyrrsetningarkrafan hafi ekki átt við nein rök að styðjast,“ segir í tilkynningunni.
„Vert er að benda á að langstærstur hluti krafna framangreindra félaga á hendur Valitor, eða um 95%, er krafa SPP sem er að langmestu leyti í eigu Julian Assange, auk nokkurra Íslendinga. Það félag hefur aldrei átt í neinu viðskiptasambandi við Valitor. Auk þess hefur félagið aldrei haft nema hverfandi tekjur en gerir samt milljarða kröfur á hendur fyrirtækinu. Valitor hefur frá upphafi talið að enginn grundvöllur sé fyrir kröfugerð SPP og hefur því ítrekað hafnað henni. Auk þess er vert að minna á að enginn dómur hefur fallið um kröfugerð SPP.“
Datacell og Sunshine Press Productions, sem önnuðust rekstur greiðslugáttar fyrir Wikileaks, hyggjast fara í skaðabótamál gegn Valitor vegna þess að félagið ákvað einhliða og án fyrirvara að loka gáttinni árið 2011.
Fyrirtækin fóru fram á að sýslumaðurinn kyrrsetti eignir Valitors fyrir sex og hálfan milljarð króna.
„Forsvarsmaður Wikileaks hefur greint frá því að samtökin hafi ekki orðið fyrir tjóni vegna lokunarinnar heldur stórgrætt, þar sem þau hafi orðið að taka við bitcoin gjaldmiðlinum þess í stað, en verðmæti hans hefur aukist um 50.000 % síðan þá,“ segir einnig í tilkynningunni.