Lögreglan á Vestfjörðum hafði hinn 7. mars afskipti af tveimur mönnum af höfuðborgarsvæðinu, sem virtust nýlega komnir til Ísafjarðar. Þeir voru við bifreið sína og það kom í ljós mennirnir voru í annarlegu ástandi. Í bifreiðinni fannst töluvert af varningi sem í ljós kom að var þýfi.
Fram kemur í tilkynningu frá lögeglu, að hluti þess hafi verið stolið úr húsnæði í Ísafjarðardjúpi, nóttina áður, en annað á höfuðborgarsvæðinu. Á öðrum mannanna fundust fíkniefni, nánar til tekið ætlað amfetamín.
Í tengslum við rannsókn málsins framkvæmdi lögreglan húsleit á þremur stöðum í Ísafjarðarbæ. Meira þýfi fannst á tveimur þeirra staða, auk ætlaðra fíkniefna og ólöglegra hormónalyfja.
Við rannsóknina var fleira fólk handtekið, grunað um aðild að málinu, eða samtals fimm manns. Þetta fólk var í haldi meðan rannsókn málsins fór fram og var sleppt að loknum yfirheyrslum daginn eftir.