Í kringum fimmtíu manns hafa afpantað pakkaferð sína til Moskvu á HM í knattspyrnu á vegum Gamanferða vegna þess að þeir fengu ekki miða á leik Íslands og Argentínu en mikil eftirspurn hefur verið eftir miðum á þann leik.
Að sögn Þórs Bæring Ólafssonar hjá Gamanferðum höfðu tæplega 300 manns pantað ferð til Moskvu og hafa flestir af þessum fimmtíu sem fengu ekki miða á leikinn ákveðið að færa sig yfir á leik Íslands og Króatíu sem verður spilaður í borginni Rostov 26. júní. Það verður síðasti leikur Íslands í riðlinum. Fyrsti leikurinn verður gegn Argentínu og annar leikurinn gegn Nígeríu.
Þór segir að enn séu til miðar á leikinn gegn Króatíu, ásamt flugi og gistingu.
„Flestir okkar kúnnar virðast vera að færa sig yfir á þann leik. Það vilja allir upplifa að fara á HM. Það var mikið gert úr þessum fyrsta leik en núna held ég að fólk sé að átta sig á því að síðasti leikurinn er líka gríðarlega mikilvægur. Maður veit aldrei hvort þetta verður úrslitaleikur um sæti í 16-liða úrslitum eða hvað,“ segir hann.
Hvað leikinn gegn Nígeríu varðar segir Þór að erfitt sé að ná sér í flug og hótel til Volgograd þar sem leikurinn verður spilaður og því sé leikurinn gegn Króatíu besti kosturinn eins og staðan er núna.
Alls eru um 600 til 700 manns á leiðinni á HM í Rússlandi í sumar á vegum Gamanferða. Það er ekki eins mikill fjöldi og fór á vegum fyrirtækisins á EM í Frakklandi þegar um 1.000 Íslendingar fóru.
Þór gagnrýnir hversu langan tíma hefur tekið fyrir fólk að fá að vita hvort það fær miða á HM eða ekki. Fólk sé rétt núna að fá staðfestingu á því á meðan allt hafi verið klárt varðandi miðamálin í byrjun janúar vegna EM í Frakklandi.
Greint var frá því fyrir nokkru að verð á hótelherbergjum hefði hækkað mikið í Rússlandi vegna HM og sumir sem þegar höfðu keypt gistingu í landinu hefðu fengið tilkynningu um að verðið hafi verið hækkað. „Þetta var smá maus í upphafi en þetta er allt komið í lag núna,“ segir Þór og bendir á að ferðaskrifstofan skipti núna við rússneskt fyrirtæki sem annist þessa hluti fyrir hana. Það samstarf hafi gengið mjög vel.