„Kæri vinur, forseti Íslands. Viltu heiðra okkur með nærveru þinni á morgun, miðvikudag?,“ svona hefst bréf sem Guðna Th. Jóhannessyni forseta Íslands barst í gær frá fjórum leikskólastúlkum á leið á HM í skák í Albaníu. Ekki stóð á forsetanum sem var mættur í morgun til að kveðja stúlkurnar. „Þegar maður fær svona bréf, hvernig er hægt að segja nei?,“ sagði Guðni þegar hann sýndi mbl.is bréfið frá stelpunum við komuna á Laufásborg í morgun.
Þetta er í fyrsta skipti sem hópur frá skólanum fer á mótið og er afrakstur af tíu ára þróun á skákkennslu við skólann undir leiðsögn Omars Salama. Stelpurnar fara ásamt foreldrum sínum og Omari á mótið þar sem krakkar frá löndum á borð við Bandaríkjunum, Rússlandi, Tyrklandi, S-Afríku og Brasilíu munu etja kappi í skák.
Hér má sjá heimsókn okkar til stúlknanna á dögunum þar sem stelpurnar segja frá ævintýrinu sem þær eru að fara í.