Móttaka slasaðra gekk vel þrátt fyrir álag

Móttaka þriggja einstaklinga sem slösuðust mikið í bílslysi við afleggjara Landeyjahafnarvegar gekk vel, þrátt fyrir mikið álag á bráðadeild Landspítalans í dag. Þetta segir Jón Magnús Kristjánsson, yfirlæknir á bráðamóttökunni.

Voru sjúklingarnir fluttir með þyrlu til Reykjavíkur síðdegis í dag. Einn lést í slysinu.

Frétt af mbl.is

Banaslys á Suðurlandsvegi

„Álagið minnkaði aðeins rétt áður en þessir sjúklingar komu. Fjöldi innlagðra sjúklinga fór úr  þrjátíu niður í tuttugu. Það gerði að verkum að við náðum að rýma bráðastæðin okkar áður en þeir komu og móttaka þeirra gekk eins og hún á að gera,“ segir Jón Magnús, en nefnir að bráðadeildin eigi erfitt um vik að taka á móti mikið slösuðum sjúklingum þegar margir liggi inni. Alls er gert ráð fyrir 34 sjúklingum þar, og plássið sé því af skornum skammti.

Frétt af mbl.is

„Verulega erfitt og þungt ástand“

Jón Magnús segir að mikið viðbragð verði á spítalanum þegar alvarleg slys verði og það viðbragð sé enn í gangi.

„Þetta verður til þess að legudeildirnar taka við enn fleiri sjúklingum en þær eiga almennt að gera. Þeir sjúklingar liggja enn á deildunum í þeim tilgangi að létta á bráðadeildunum og gera þeim kleift að taka á móti nýjum bráðatilfellum,“ segir hann.

• Blogga um frétt