Hrafnhildur Ásta Þorvaldsdóttir hefur verið endurskipuð í embætti framkvæmdastjóra Lánasjóðs íslenskra námsmanna (LÍN). Þetta kemur fram í tilkynningu á vef Stjórnarráðs Íslands.
Lilja Alfreðsdóttir menntamálaráðherra skipaði í mars verkefnastjórn um endurskoðun á lögum um LÍN. Formaður stjórnarinnar er Gunnar Ólafur Haraldsson, hagfræðingur og fyrrverandi forstöðumaður Hagfræðistofnunar Háskóla Íslands. Búast má við upplýsingum um fyrstu áform verkefnastjórnarinnar nú í sumar.
Meðal álitaefna sem verkefnastjórnin mun taka til skoðunar eru hvers konar nám skuli vera lánshæft, hvernig vöxtum og endurgreiðslu skuli háttað hjá sjóðnum og fjármögnun hans.
Lánþegar Lánasjóðs íslenskra námsmanna eru um 7.000 talsins en meginhlutverk sjóðsins er að tryggja þeim sem falla undir lög hans tækifæri til náms án tillits til efnahags.