Sjálfstæðisflokkurinn í Vestmannaeyjum mun ekki áfrýja úrskurði kjörnefndar, sem tók fyrir kæru flokksins, til dómsmálaráðuneytisins. Þetta kemur fram í tilkynningu frá flokknum.
Flokkurinn kærði talningu bæjarstjórnarkosninganna í síðasta mánuði en einungis vantaði fimm atkvæði upp á að flokkurinn næði sínum fjórða bæjarfulltrúa og héldi meirihluta í bænum. Þess í stað fékk flokkurinn þrjá fulltrúa, líkt og H-listi Fyrir Heimaey en Eyjalistinn fékk einn. Úr varð að Fyrir Heimaey og Eyjalistinn mynduðu meirihluta.
Kæran sneri annars vegar að fjórum utankjörfundaratkvæðum sem bárust kjörstjórn of seint og voru því ekki talin gild, og hins vegar að einu atkvæði greiddu H-lista, sem Sjálfstæðismenn vildu dæmt ógilt þar sem kjósandi deildi mynd af því á samfélagsmiðlum.
Þriggja manna kjörnefnd hæstaréttarlögmanna tók kæruna fyrir og staðfesti hún niðurstöðu talningar.
Í tilkynningu frá flokknum segir að bagalegt sé að vilji kjósandans nái ekki fram að ganga og ljóst að eðlilegt hafi verið að láta reyna á rétt hans til að ná sínu fram. Það sé landsbyggðarmál að laga þann hluta kosningalöggjafarinnar sem snýr að utankjörfundaratkvæðagreiðslu að nútímanum á þann veg að kjósandinn þurfi ekki sjálfur að koma atkvæðum sínum landshlutanna á milli.