Lyfjastofnun hefur innkallað nokkur lyf sem innihalda valsartan, sem er notað í meðferð við háþrýstingi og hjartabilun. Stofnuninni var gert viðvart um mengun í virka efninu valsartan sem framleitt er af Xheijang Huahai Pharmaceuticals.
Í varnaðarskyni hefur Lyfjastofnun ákveðið, líkt og systurstofnanir í Evrópu undir yfirumsjón Lyfjastofnunar Evrópu, að innkalla þau lyf sem mengunin kann að hafa haft áhrif á. Lyf sem innihalda valsartan frá Xheijang Huahai Pharmaceuticals hafa verið innkölluð og sala á þeim þar með stöðvuð í apótekum.
Lyfjastofnun vinnur nú að því í samvinnu við systurstofnanirnar í Evrópu að fá yfirsýn yfir umfang málsins og leita annarra leiða fyrir þá sjúklinga sem tekið hafa umrædd lyf. Í tilkynningu frá Lyfjastofnun segir að vel verði fylgst með framvindu mála og upplýsingum miðlað eins og þörf krefur.
Eftirfarandi lyf hafa verið innkölluð:
Heiti lyfs |
Vörunúmer |
Valpress filmhtfl 80 mg 98 stk |
09 80 59 |
Valpress filmhtfl 160 mg 98 stk |
09 80 68 |
Valpress Comp filmhtfl 172, 5 mg 98 stk |
13 23 61 |
Valpress Comp filmhtfl 92, 5 mg 98 stk |
13 23 72 |
Valsartan Ratiopharm filmhtfl 160 mg 98 stk |
39 57 32 |
Valsartan Ratiopharm filmhtfl 40 mg 14 stk |
41 06 49 |
Valsartan Ratiopharm filmhtfl 80 mg 98 stk |
53 86 96 |
Valsartan / Hydrochlorothiazide Ratiopharm filmhtfl 172,5 mg 98 stk |
15 92 95 |
Valsartan / Hydrochlorothiazide Ratiopharm filmhtfl 185 mg 98 stk |
50 12 25 |
Valsartan / Hydrochlorothiazide Ratiopharm filmhtfl 92,5 mg 98 stk |
54 67 22 |
Samkvæmt upplýsingum frá Lyfjastofnun er notendum lyfjanna óhætt að halda áfram að taka þau þar til þeir hafa tækifæri til að ræða við lækni um breytta meðferð. Ef notendur hafa áhyggjur er þeim bent á að hafa samband við lækni eða lyfjafræðing í apóteki til að fá frekari upplýsingar.