Þyrla sótti slasaða konu að Skógum

Þyrla Landhelgisgæslu Íslands, TF-GNA, var kölluð út á tíunda tímanum til þess að sækja slasaða konu við Skógafoss. Þetta staðfestir Ásgeir Erlendsson upplýsingafulltrúi LHG við mbl.is, en Vísir greindi fyrst frá. 

Konan var flutt á Landspítala til aðhlynningar. Ekki hafa fengist upplýsingar um líðan hennar, en hún slasaðist eftir fall.

Þetta var þriðja þyrluútkallið sem Landhelgisgæslan sinnti í dag, en áhöfn TF-GNA hafði fyrr í dag sótt tvo örmagna göngumenn að Langasjó og voru þeir hífðir um borð í þyrluna.

Þá tók TF-SYN þátt í leit að hvítabirni á Melrakkasléttu framan af degi, en á þriðja tímanum var hún kölluð þaðan og út í Héraðsflóa, þar sem bátur hafði sokkið eftir að eldur kom að honum. Þar varð mannbjörg, en þyrlan hífði skipverjann um borð úr björgunarbáti sínum.

Fréttin hefur verið uppfærð.

• Blogga um frétt