Vel heppnað Vegan-festival

Samtök grænmetisæta á Íslandi og Vegan-samtökin stóðu fyrir Vegan-festival á Thorsplani í Hafnarfirði í dag.

Grillaðar voru vegan-pylsur ásamt öllu meðlæti til styrktar samtökunum. Einnig buðu ýmsir aðilar upp á vegan-vörur og veitingar, bæði á torginu og í verslunum í kring. Auk þess var veganismi kynntur fyrir gestum.

Vegan-dragdrottningin Honey LaBronx frá New York sá um að halda uppi stuðinu.

„Þetta gekk ótrúlega vel. Pylsurnar hjá okkur seldust upp og líka ísinn hjá Hafís,“ segir Birkir Steinn Erlingsson, formaður Vegan-samtakanna, en boðið var upp á 300 pylsur frá Lindu McCartney.  

Allur ágóði rennur til styrktar samtökunum tvennum.

Hátíðin stóð yfir frá klukkan 12 til 15 og mættu nokkur hundruð manns, að sögn Birkis Steins.

Hátíðin var síðast haldin fyrir tveimur árum af Samtökum grænmetisæta á Íslandi og var þessi hátíð sú þriðja í röðinni. Hún var jafnframt sú fyrsta þar sem Vegan-samtökin tóku einnig þátt.