Tveir lausir úr gæsluvarðhaldi

Tveir karlmenn á þrítugsaldri sem voru úrskurðaðir í gæsluvarðhald á mánudag vegna ráns í Hafnarfirði eru lausir úr haldi samkvæmt upplýsingum frá lögreglu.

Héraðsdómur Reykjaness úrskurðaði mennina í gæsluvarðhald að kröfu lögreglunnar á höfuðborgarsvæðinu í þágu rannsóknar hennar á ráni í fyrirtæki í Hafnarfirði.

Frétt af mbl.is

Tveir í gæsluvarðhald vegna ráns

Annar mannanna var handtekinn við vettvanginn áður en tilkynning um ránið barst lögreglu. Lögreglumenn við eftirlitsstörf veittu grunsamlegum manni athygli og stöðvuðu för hans. Sá var með fjármuni á sér sem hann gat ekki gert grein fyrir.

Hinn maðurinn var handsamaður á svipuðum slóðum ekki löngu síðar og voru þeir báðir færðir til yfirheyrslu á lögreglustöð.

Gæsluvarðhaldið átti að renna út í dag en mennirnir losnuðu fyrr úr haldi. Landsréttur snéri við gæsluvarðhaldsúrskurði héraðsdóms yfir öðrum manninum og var honum sleppt daginn eftir. Hinum manninum var sleppt í gær eða fyrradag samkvæmt heimildum mbl.is.

• Blogga um frétt