Bjarg íbúðafélag og IKEA hafa gert samkomulag um samstarf vegna íbúða Bjargs. Í samkomulaginu felst að Bjarg mun leitast við að nota innréttingar IKEA í íbúðir félagsins. IKEA mun taka þátt í hönnunarferli íbúða og útfæra innréttingarnar með það að markmiði að ná fram hámarksnýtingu rýma. Þetta kemur fram í fréttatilkynningu.
Björn Traustason, framkvæmdastjóri Bjargs, segir í fréttatilkynningu: „Bjarg leitar allra leiða til að framleiða hagkvæmar íbúðir og þjónusta leigutaka á sem bestan hátt. Samstarf við IKEA uppfyllir bæði þessi markmið.
Að gefa leigutökum tækifæri að aðlaga íbúðir að sínum þörfum með aðgengi að lausnum á viðráðanlegu verði er nýjung á leigumarkaði og hlökkum við til samstarfsins við IKEA.”
Þórarinn Ævarsson, framkvæmdastjóri IKEA, segir í sömu fréttatilkynningu: „Við hjá IKEA erum stolt af því að fá að taka þátt í þessu krefjandi verkefni með Bjargi. IKEA hefur um árabil verið leiðandi í hönnun á innréttingum þar sem áhersla er lögð á að nýta takmarkað pláss sem best og á sem hagkvæmustu verði.”
Bjarg er húsnæðissjálfseignastofnun, stofnuð af ASÍ og BSRB. Félagið er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að hagkvæmu, öruggu og vönduðu íbúðarhúsnæði í langtímaleigu. Um er að ræða leiguheimili að norrænni fyrirmynd sem standa munu til boða þeim félagsmönnum aðildarfélaga ASÍ og BSRB sem eru undir ákveðnum tekju- og eignamörkum, skilgreindum í lögum um almennar íbúðir.