Með umbótum á menntun, innviðum, nýsköpun og starfsumhverfi er hægt að efla samkeppnishæfni Íslands, auka verðmætasköpun og farsæld þjóðarinnar.
Þetta er meðal þess sem kemur fram í nýrri skýrslu Samtaka iðnaðarins (SI) um atvinnustefnu fyrir Ísland sem kynnt verður á opnum fundi í Hörpu í dag.
Á fundinum er dregin upp mynd af Íslandi árið 2050 og farið yfir helstu áskoranir sem landið stendur frammi fyrir á næstu árum, en árið 2050 verður íslenskt hagkerfi tvöfalt stærra en það er í dag, Íslendingar verða mun fleiri en nú og færri verða á vinnualdri fyrir hvern íbúa eldri en 65 ára.
Öldrun þjóða, loftslagsmál og fjórða iðnbyltingin eru meðal þeirra viðfangsefna sem munu hafa mikil áhrif á samfélagið og sem við þarf að bregðast. Í skýrslunni eru kynntar fjölmargar tillögur að umbótum sem grípa þarf til á næstu tveimur árum eigi lífskjör landsmanna áfram að vera með því besta sem þekkist.
Meðal þeirra umbóta sem lagðar eru til er að fjölga iðnmenntuðum á vinnumarkaði, skapa nægjanlegt framboð íbúða til að mæta þörfum íbúa og skapa stöðugra, hagkvæmara og skilvirkara starfsumhverfi.
Fundarstjóri er Jóhanna Vigdís Arnardóttir, verkefnastjóri í menntamálum hjá SI. Áður en Sigurður Hannesson, framkvæmdastjóri SI, kynnir atvinnustefnuna mun Guðrún Hafsteinsdóttir, formaður SI, ávarpa fundinn.
Hér má nálgast nánari dagskrá fundarins, sem hófst klukkan 8:30, og fylgjast má með í beinu streymi hér að neðan: