Björgun stefnir að því að endurnýja að hluta skipakost félagsins á næstu misserum. Annað hvort verður það gert með nýsmíði dæluskips eða fjárfestingu í notuðu skipi. Ljóst sé að ferlið muni taka töluverðan tíma.
Þetta kemur fram í frétt á heimasíðu fyrirtækisins. Eins og fram hefur komið í blaðinu hafa Vegagerðin og Björgun undirritað verksamning um dýpkun Landeyjahafnar næstu þrjú árin, þ.e. 2019 -2021.
Björgun átti langlægsta tilboð í dýpkun í og við Landeyjahöfn, 620 milljónir. Núverandi verktaki, belgíska fyrirtækið Jan De Nul, bauð 1.179 milljónir. Björgun bauð núverandi skipa- og tækjabúnað félagsins til verksins sem henta við mismunandi aðstæður og á mismunandi dýpkunarsvæðum.