Landsréttur hefur að kröfu lögreglustjórans á Norðurlandi eystra framlengt gæsluvarðhald yfir karlmanni sem grunaður er um alvarlega hnífstunguárás við útibú Arion banka á Geislagötu á Akureyri í byrjun nóvember.
Maðurinn hafði áður verið úrskurðaður í gæsluvarðhald sem rann út 30. nóvember og hefur það verið framlengt til 17. desember með tilliti til almannahagsmuna.
Vitni urðu að árásinni á Geislagötu, auk þess sem lögreglan hefur undir höndum gögn úr eftirlitsmyndavélum sem sögð eru gefa góða mynd af atburðarásinni. Sá grunaði hafði yfirgefið vettvang þegar lögregla mætti á staðinn, en hann var handtekinn skömmu síðar. Blóðugur hnífur fannst við húsleit lögreglu á dvalarstað mannsins.
Í úrskurði Landsréttar kemur fram að við skoðun upptöku úr eftirlitsmyndavél er svo að sjá sem árásarmaðurinn hafi hnífsblað í krepptum hnefanum, sem kemur út á milli fingra hans. Sést hann slá brotaþolann í eftir hluta líkama, háls og höfuð.
Sá sem varð fyrir árásinni var fluttur á Sjúkrahús Akureyrar þar sem hann gekkst undir aðgerð, en hann var ekki í lífshættu. Í bráðabirgðavottorði um áverka mannsins sem vísað er til í úrskurði Landsréttar kemur fram að maðurinn hafi hlotið fjölmarga skurði um andlit og bak, meðal annars djúpan skurð neðan við vinstra kjálkabarð. Þá hlaut hann einnig höfuðkúpubrot.
Sterkur grunur er um að brot árásarmannsins varði ævilangt fangelsi.