Ragnar Þór Ingólfsson var sá eini sem bauð sig fram til formanns VR og er hann því sjálfkjörinn formaður stéttarfélagsins.
Þetta kemur fram í tilkynningu.
Framboðsfrestur vegna formanns- og stjórnarkjörs VR rann út á hádegi í dag. Ragnar Þór tók við formennsku í VR fyrir tveimur árum.
„Kjörstjórn VR hefur úrskurðað eitt einstaklingsframboð til formanns VR fyrir kjörtímabilið 2019-2021 löglega fram borið en það er framboð Ragnars Þór Ingólfssonar og er hann því sjálfkjörinn formaður VR til næstu tveggja ára. Önnur framboð til formanns bárust ekki,“ segir í tilkynningunni.
Kjörstjórn VR hefur fengið 16 einstaklingsframboð til stjórnar VR fyrir kjörtímabilið 2019-2021 og vinnur í að kanna lögmæti þeirra.
Fundur verður haldinn með frambjóðendum kl. 12 á miðvikudaginn og verða nöfn frambjóðenda birt á vef VR að honum loknum.
Alls verður kosið til sjö sæta í stjórn og þriggja í varastjórn.