Hélt að hún myndi deyja á miðjum aldri

„Ég átti alls ekki von á því að verða hundrað ára. Ég átti frekar von á því að ég myndi látast á miðjum aldri því ég var alltaf með magasár og vesen á þeim árum. En ég náði mér þokkalega af því af aldrinum að dæma. Það er alveg ótrúlegt.“

Þetta segir Líney Guðmundsdóttir, sem fagnar 100 ára afmæli í dag. Hún hefur góða sjón og les Morgunblaðið daglega og hefur mjög gaman af að leysa krossgátuna. Það er heilaleikfimin hennar.

Í samtali í Morgunblaðinu í dag segist Líney fyrst muna eftir sér átta ára gamalli, árið sem pabbi hennar dó 33 ára gamall árið 1927. Hún fór þá í fóstur að Reykjarhóli í Fljótum og ílengdist þar.