Hús íslenskunnar rís loksins

Teikning af Húsi íslenskunnar, séðu frá Suðurgötu.
Teikning af Húsi íslenskunnar, séðu frá Suðurgötu.

Gengið verður að tilboði lægstbjóðanda, Ístaks, í byggingu Húss íslenskunnar sem rísa mun við Arngrímsgötu í Reykjavík. Þetta kemur fram í fréttatilkynningu frá mennta- og menningarmálaráðuneytinu. Heildarkostnaðaráætlun vegna framkvæmdanna nemur um 6,2 milljörðum króna.

Ráðist var í gerð heildarkostnaðaráætlunar fyrir verkefnið eftir útboðið, en sú kostnaðaráætlun sem miðað var við í útboðinu hljóðaði upp á rúma 3,7 milljarða og var lægsta boð 20% umfram þá áætlun.

Fram kemur í tilkynningunni að ríkissjóður muni fjármagna 70% af heildarkostnaði og Háskóli Íslands 30% með sjálfsaflafé. Tilboð í framkvæmdir voru opnuð í febrúar síðastliðnum, en þrjú tilboð bárust og voru þau öll metin gild af hálfu Framkvæmdasýslu ríkisins. Verktakafyrirtækið Ístak átti lægsta tilboðið og að því verður gengið.

Í tilkynningunni segir að tryggt verði að fjármagn til verkefnisins rúmist innan fjármálaáætlunar og að næstu skref verði samningsgerð við Ístak um framkvæmd verksins. Ráðgert er að verklegar framkvæmdir muni taka um þrjú ár.

„Fagnaðarefni“ segir Lilja

„Það er fagnaðarefni að framkvæmdir við Hús íslenskunnar séu að hefjast. Þetta er löngu tímabært að verðugt hús sé reist til að varðveita handritin okkar. Þau eru einar merkustu gersemar þjóðarinnar og geyma sagnaarf sem ekki aðeins er dýrmætur fyrir okkur heldur hluti af bókmenntasögu heimsins. Nú er heppilegur tími fyrir opinberar framkvæmdir í ljósi þess að hagkerfið er að kólna,“ er haft eftir Lilju Dögg Alfreðsdóttur, mennta- og menningarmálaráðherra, í fréttatilkynningu.

Þingsályktunartillaga um eflingu íslenskunnar sem opinbers máls liggur nú fyrir á Alþingi en liður í henni er vitundarvakning um mikilvægi tungumálsins, sögu þess og sérstöðu. Í fréttatilkynningu er haft eftir Lilju að íslensk tunga sé „undirstaða og fjöregg íslenskrar menningar“.

Lilja Alfreðsdóttir, mennta- og menningarmálaráðherra.
Lilja Alfreðsdóttir, mennta- og menningarmálaráðherra. mbl.is/Hari

„Við viljum sýna henni og menningararfinum sóma. Hús íslenskunnar mun þjóna fjölbreyttum tilgangi og verður um leið mjög táknræn bygging fyrir mikilvægi tungumálsins fyrir okkur öll,“ segir ráðherra.

Handritin eru í umsjón Stofnunar Árna Magnússonar sem hafa mun aðstöðu í húsinu ásamt íslensku- og menningardeild Háskóla Íslands. Í byggingunni verða sérhönnuð rými fyrir varðveislu, rannsóknir og sýningu á skinnhandritum auk vinnustofa fyrir kennara og fræðimenn, lesrýmis, fyrirlestra- og kennslusala, bókasafns og kaffihúss. Húsið verður á þremur hæðum auk kjallara undir hluta þess, heildarflatarmál þess er tæpir 6.500 m2.

Löng bið senn á enda

Verkefnið hefur átt sér ansi langan aðdraganda, en ákvörðun um framlag til byggingar hússins var fyrst tekin á Alþingi árið 2005. Niðurstaða hönnunarsamkeppni um útlit hússins var kynnt í ágúst árið 2008, en framkvæmdum var svo slegið á frest í kjölfar efnahagshrunsins.

Árið 2013 tók þáverandi mennta- og menningarmálaráðherra, og nú forsætisráðherra, Katrín Jakobsdóttir, fyrstu skóflustunguna á lóðinni við Arngrímsgötu 5 og var síðar ráðist í jarðvinnu vegna verkefnisins. Verkið hef­ur verið í biðstöðu síðan og stór hola hefur minnt á óklárað verkið, en nú má búast við því að framkvæmdir fari senn að hefjast.

Hús íslenskunnar rís á næstu árum við Arngrímsgötu 5, en …
Hús íslenskunnar rís á næstu árum við Arngrímsgötu 5, en þar hefur hin svokallaða „Hola íslenskra fræða“ verið í rúman hálfan áratug. mbl.is/Árni Sæberg
mbl.is