Hjólakraftur hlaut Foreldraverðlaunin

Verkefnið Hjólakraftur í Norðlingaskóla hlaut í dag Foreldraverðlaun samtakanna Heimilis og skóla, en markmið verðlaunanna er að vekja athygli á því gróskumikla starfi sem fram fer innan leik-, grunn- og framhaldskóla og þeim mörgu verkefnum sem stuðla að öflugu jákvæðu samstarfi heima, skóla og samfélagins. Verðlaunin voru afhent við hátíðlega athöfn í Safnahúsinu við Hverfisgötu í dag.

Fjölmargar tilefningar bárust frá almenningi, en Hjólakraftur hlaut hnossið að þessu sinni. Verkefnið hófst á vorönn 2016 og hefur það að markmiðið að virkja alla nemendur skólans í hreyfingu í gegnum hjólreiðar og virkja foreldra þeirra með. Annað markmið með verkefninu er að ná til þeirra nemenda sem eru vanvirkir í skólaíþróttum, búa við erfiðar félagslegar aðstæður eða þeirra sem eru nýir íbúar í Reykjavík með erlendan bakgrunn.

Verðlaunin voru veitt við hátíðlega athöfn í blíðskaparveðri í dag. Ljósmynd/Aðsend

Dómnefnd verðlaunanna sagði verkefnið stuðla að „bættri lýðheilsu íbúa og foreldrra nemenda í úthverfi Reykjavíkurborgar í gegnum hjólreiðar“ og að verkefnið falli vel að markmiðum um heilsueflingu og umhverfisvæna lífshætti auk þess sem allir eigi kost á að taka þátt, óháð efnahag.

„Verkefnið eykur enn fremur félagsfærni og tengir saman ólíka einstaklinga í gegnum hjólreiðar,“ sagði dómnefnd.

Lestrarvinir og Þollóween fengu hvatningarverðlaun

Heimili og skóli veittu einnig tvenn sérstök hvatningarverðlaun til tilnefndra verkefna, en þau féllu í skaut verkefnisins Lestrarvina í Víðistaðaskóla og Þollóween, sem er bæjarhátíð í Þorlákshöfn.

Lestrarvinir er samstarfsverkefni Víðistaðaskóla við Hrafnistu í Hafnarfirði og felst verkefnið í því að nemendur í 6. bekk skólans eiga sér lestrarvini úr hópi heimilisfólks á Hrafnistu og fara þangað reglulega og lesa fyrir vini síni sína af eldri kynslóð.

Lestrarvinir í Víðistaðaskóla og Hrafnista í Hafnarfirði hlutu hvatningarverðlaun Ljósmynd/Aðsend

„Verkefnið hefur verið við lýði síðan 2014 og tengir saman kynslóðir. Það fellur vel að markmiðum lestrarkennslu og stuðlar að jákvæðum tengslum við nærsamfélagið,” segir í umsögn dómnefndar um Lestrarvini.

Þollóween er bæjarhátíð sem haldin var í fyrsta skipti síðasta haust. Hópur foreldra barna við Grunnskólann í Þorlákshöfn stóð að verkefninu, sem var unnið í samstarfi þeirra, skólans og stofnana í samfélaginu, án allra styrkja og með miklu sjálfboðastarfi og vakti mikla lukku í bæjarfélaginu. Hátíðin samanstóð af fjölda hrekkjavökutengdra viðburða sem dreifðust yfir heila viku.

„Hópurinn lagði á sig mikla vinnu og náði að skapa samheldni, samvinnu og skemmtun fyrir alla bæjarbúa en sérstaklega börn og fjölskyldur þeirra,“ segir í umsögn dómnefndar um Þollóween.

Bæjarhátíðin Þollóween í Þorlákshöfn hlaut einnig hvatningarverðlaun Heimilis og skóla Ljósmynd/Aðsend

Jolanta er Dugnaðarforkur ársins

Dugnaðarforkur Heimilis og skóla árið 2019 er Jolanta Krystyna Brandt en hún er pólsk að uppruna. Hún hefur að sögn samtakanna náð góðum tökum á íslensku og verið drífandi í allri samvinnu milli heimila og skóla í Dalvíkurbyggð og leggur mikinn metnað í öll störf sem hún tekur sér fyrir hendur.

„Hún hefur gegnum tíðina hvatt aðra foreldra til þátttöku í ýmsum verkefnum og námskeiðum m.a. íslenskunámi og verið óeigingjörn á að túlka og þýða fyrir aðra foreldra og nemendur. Jolanta hefur starfað sem stuðningsfulltrúi í Dalvíkurskóla frá haustinu 2013 og lauk hún námi sem stuðningsfulltrúi vorið 2015.

Jolanta Krystyna Brandt er Dugnaðarforkur Heimilis og skóla árið 2019. Ljósmynd/Aðsend

Jolanta hefur verið formaður foreldrafélags Dalvíkurskóla frá hausti 2017 og unnið óeigingjarnt starf í þágu skólans. Eftirtektarvert er hversu viljug Jolanta er að bæta við sig þekkingu og miðla henni til skólans, annara foreldra og samfélagsins alls. Jolanta er foreldri sem er virk í samvinnu skóla og heimila, bæði í leik- og grunnskóla. Í tilnefningu segir að hún sé drífandi og hvetji aðra til þátttöku í skólasamfélaginu,“ segir í fréttatilkynningu frá Heimili og skóla um verðlaunin.

• Blogga um frétt