Læknar veri vakandi fyrir einkennum

Þrír Íslendingar smituðust.
Þrír Íslendingar smituðust. mbl.is/Eggert

„Læknar þurfa að vera vakandi fyrir sjaldgæfum sjúkdómum sérstaklega hjá Íslendingum sem ferðast erlendis,“ segir Þórólfur Guðnason sóttvarnarlæknir um þrjá íslenska ferðamenn sem greindust á Íslandi með chik­ung­unya-sótt eftir ferðalag til Spánar.  

Ekki er vitað hvort fleiri hafa smitast en beðið er eftir niðurstöðum rannsóknar frá Noregi hvort tilfellin séu fjögur. Þórólfur bendir á að það gæti vel verið að Íslendingar hafi smitast af þessu en ekki fengið greiningu.  

Chik­ung­unya-sótt berst með svo­kölluðum tígris-moskítóflug­um. Ekk­ert bólu­efni er til við henni og eng­in sér­stök meðferð og því er lögð áhersla á að draga úr sárs­auka sjúk­linga. Helstu ein­kenni eru hiti, liðverk­ir, út­brot, eymsli í neðra baki og stíf­leiki.

Tvær systur og sonur annarrar þeirra greindust með sjúkdóminn. Beðið er eftir niðurstöðu rannsóknar hvort þriðja syst­ir­in hafi einnig greinst með sótt­ina en hún smit­ast ekki á milli manna.

Hann segir að engin hætta sé á ferð og sóttin eigi að ganga yfir. Hins vegar getur hún haft einhver eftirköst eins og til dæmis áframhaldandi liðverki.  

Spánverjar fylgjst vel með

Þetta er fyrsta staðfesta smitið frá Spáni. Heilbrigðisyfirvöld hafa mikinn áhuga á þessu og gott samstarf er á milli Íslands og Spánar, að sögn Þórólfs. Vírus­inn er nokkuð út­breidd­ur í Afr­íku og Asíu en er sjald­gæf­ur í Evr­ópu. Til­felli hafa þó komið upp á Ítal­íu og í Frakklandi.

Þórólfur segir vísbendingu um að þessir sjúkdómar séu að færast upp eftir Evrópu. „Við sjáum alltaf þessa þróun í sjúkdómum og það þarf ekki að koma á óvart,“ segir Þórólfur. Hvað veldur því nákvæmlega gæti verið hlýnun jarðar vegna loftslagsbreytinga.   

mbl.is