Þyrla Landhelgisgæslunnar var kölluð út rétt fyrir klukkan eitt vegna slasaðs manns í norðanverðu Búrfelli í Skeiða- og Gnúpverjahreppi. Maðurinn var að fljúga svifvæng (e. paraglider) og þurfti að nauðlenda honum í fjallinu.
Samkvæmt upplýsingum frá Landhelgisgæslunni fór þyrlan í loftið klukkan 12:56 og er lent á slysstað. Viðbragðsaðilar frá lögreglunni á Suðurlandi eru einnig á staðnum ásamt björgunarsveitum úr Árnessýslu.
Uppfært klukkan 14:21: Maðurinn, sem er íslenskur og á fimmtugsaldri, var hífður um borð í þyrlu Landhelgisgæslunnar og verið er að flytja hann á Landspítalann í Fossvogi. Hann er ekki talinn lífshættulega slasaður.
Fréttin hefur verið uppfærð.