Konan sem var vistuð í fangageymslu lögreglu eftir að eldur kom upp í íbúð hennar á stúdentagörðunum við Eggertsgötu hefur verið yfirheyrð og var henni sleppt úr haldi lögreglu í framhaldinu. Þetta staðfestir Jóhann Karl Þórisson, aðstoðaryfirlögregluþjónn, í samtali við mbl.is.
Enn er of snemmt að segja til um hvort talið sé að um íkveikju eða óhapp sé að ræða. Það kemur í ljós á föstudaginn þegar tæknideild lögreglunnar hefur náð að athafna sig á vettvangi.
Enn sem komið er er ekki tilefni til að fara fram á gæsluvarðhald yfir konunni.
Vitni sáu konuna hlaupa út úr íbúðinni með reykmökkinn á eftir sér og lét hún öllum illum látum í kjölfarið. Hún var því send á slysadeild, til að athuga með reykeitrun, og vistuð í fangageymslu í framhaldinu.
„Það var ekkert hægt að tala við hana í gær, hún var bara ekki viðræðuhæf,“ sagði Jóhann Karl í samtali við mbl.is fyrr í dag.
Íbúðin, sem varð eldinum að bráð, er samkvæmt heimildum mbl.is tveggja herbergja paraíbúð og býr konan þar ásamt sambýlismanni.
Hann var ekki nálægt vettvangi í gær og því þykir ekki tilefni til þess að yfirheyra hann vegna málsins miðað við fyrirliggjandi upplýsingar, segir Jóhann Karl.