Erna er ein þeirra barna sem mismunað er vegna stöðu foreldra sinna. Hún fæddist á Íslandi í apríl 2017 og hefur til þessa dags aldrei stigið fæti út fyrir landið. Þegar hún fæddist var hún fyrst skráð á utangarðsskrá sem „viðskiptavinur Íslands". Síðar fékk hún hefðbundna kennitölu en var þá heimilisfangi hennar breytt án vitundar bæði foreldra og lögmanns. Nýja heimilisfangið var „Evrópa“.
Þetta kemur fram í nýju innslagi félagasamtakanna „Réttur barna á flótta“. Samtökin eru nýstofnuð en tilefni þeirra er sá mikli fjöldi barna á flótta sem vísað hefur verið úr landi á undanförum árum í mikilli andstöðu við fólkið í landinu.
Bent er á að börn á flótta séu í sérstaklega viðkvæmri stöðu og hér á landi séu börn sem þurfi alþjóðlega vernd.
Stutt myndbönd með Benedikt Erlingssyni og Halldóru Geirharðsdóttur í aðalhlutverkum voru framleidd vegna átaksins. „Um er að ræða grafalvarlegt grín þar sem skotspæninum er beint að Útlendingastofnun og kærunefnd útlendingamála,“ segir í tilkynningu.