Gunnar Baldvinsson, framkvæmdastjóri Almenna lífeyrissjóðsins, segir sjóðinn vel í stakk búinn til að takast á við verðsveiflur á húsnæði. Tilefnið er sú niðurstaða Seðlabankans að áhætta á íbúðamarkaði hafi aukist. Til dæmis gæti íbúðaverð lækkað í miðborginni.
Lífeyrissjóðirnir hafa styrkt stöðu sína á markaði með íbúðalán. Birtist það m.a. í því að Lífeyrissjóður verslunarmanna hefur endurskoðað útlánaskilyrði. Vöxtur útlána muni að óbreyttu leiða til ójafnvægis í áhættudreifingu. Ekki náðist í fulltrúa sjóðsins vegna þessa.
Í umfjöllun um mál þetta í Morgunblaðinu í dag segir Harpa Jónsdóttir, framkvæmdastjóri LSR, mikla ásókn í íbúðalán hjá sjóðnum. „Það er ekkert sem bendir til að eftirspurnin sé að dragast saman,“ segir Harpa. Viðmælandi blaðsins í lífeyrissjóðakerfinu taldi aðspurður að meirihlutastöðu bankanna á íbúðalánamarkaði væri ógnað. Neytendur leituðu í bestu kjörin. Sú þróun getur aftur haft áhrif á verðmæti eignarhluta ríkisins í bönkum.
Annar viðmælandi taldi að þótt áhætta sjóðanna af íbúðalánum kynni að aukast vegna aukinnar óvissu hefði hækkandi fasteignaverð síðustu misseri styrkt veðin í eignunum. Heilt yfir væri þetta ekki mikið áhyggjuefni. Fram kemur í nýjum Fjármálastöðugleika að rekstrarumhverfi fyrirtækja sé að þyngjast og vanskil að aukast í byggingariðnaði og ferðaþjónustunni.