Dýpkandi lægð á Grænlandshafi, með tilheyrandi úrkomusvæði, nálgast landið óðfluga og fer því að rigna undir hádegi í dag, fyrst vestan til og sums staðar jafnvel slydda síðdegis á Norður- og Austurlandi. Þó er fremur hlýtt í veðri miðað við árstíma.
Þetta segir í hugleiðingum veðurfræðings Veðurstofu Íslands.
Í fyrramálið fer lægðin síðan austnorðaustur yfir landið og snýst í kjölfarið í norðanátt og kólnar talsvert. Úrkoma fer þá yfir í slyddu og síðar snjókomu norðanlands, en léttir smám saman til syðra. Því má búast við hríðarveðri á Vestfjörðum, Ströndum og öllu Norðurlandi á morgun og seinna einnig fyrir austan.
Vegfarendur í fyrrnefndum landshlutum eru hvattir til að kynna sér vel veðurspár og færð áður en lagt er í hann og aka eftir aðstæðum. Síðdegis á morgun hvessir mikið undir Vatnajökli og austur á Firði, en þá geta vindhviður þar farið að valda ökumönnum vandræðum.
Segja má að vikan öll verði frekar vetrarleg enda ríkir köld norðanáttin á landinu með sínu éljalofti fyrir norðan og jafnvel víðar.
Veðurhorfur á landinu næstu daga
Á þriðjudag og miðvikudag:
Norðaustanátt, yfirleitt 10-15 m/s. Él um landið N-vert, annars bjart með köflum, en líkur á éljum allra syðst. Frost 0 til 8 stig, en um frostmark við suðurströndina.
Á fimmtudag:
Stíf norðanátt og snjókoma eða él, en yfirleitt þurrt og bjart sunnan til á landinu. Frost 0 til 7 stig, en um frostmark við sjávarsíðuna.
Á föstudag:
Minnkandi norðanátt. Léttir til í flestum landshlutum og kólnar í veðri.
Á laugardag (fyrsta vetrardag):
Útlit fyrir hæga vinda og bjartviðri í flestum landshlutum, en áfram kalt í veðri.