Innlent | mbl | 26.10.2019 | 14:15

Segir áætlun Íslandsbanka „kjánalegt ofstæki“

Helgi Magnús Gunnarsson, vararíkssaksóknar hyggst hætta viðskiptum við Íslandsbanka vegna áætlun bankans um að hætta viðskiptum við fjölmiðla sem ekki standist tiltekin skilyrði um kynjahlutföll viðmælenda og þáttagerðarfólks. mbl.is/Eggert Jóhannesson

Helgi Magnús Gunnarsson vararíkissaksóknari ætlar að færa viðskipti sín frá Íslandsbanka vegna nýrrar markaðsstefnu bankans þar sem horft verður til kynjahlutfalls innan fjölmiðla við kaup á auglýsingum.

„Manneskjum með svo lélega dómgreind er ekki treystandi fyrir fé,“ skrifar Helgi í færslu á Facebook-síðu sinni.

Hann segir jafnframt að bankanum ætti að þykja það sjálfsagt að hann kjósi að eiga ekki viðskipti við banka sem „gætir ekki betur að jöfnu hlutfalli kvenna og karla í hópi starfsmanna að það sé 60/40.“

Helgi segist gera sér grein fyrir því að hann finni kannski ekki banka með jöfn kynjahlutföll starfsmanna en að starfsmenn í öðrum bönkum hafi kannski dómgreind til að skilja að það er margt annað en kynferði sem ræður því hvaða starf fólk kýs sér og hvaða viðmælendur fjölmiðlar taka viðtöl við.

„Það yrði kannski skrýtin útkoma ef menn ætluðu að taka viðtöl við sjómenn á sjómannadaginn og tryggja jöfn hlutföll eða starfsmenn á dekkjaverkstæðum. Svona mætti lengi telja. Ég efast um að fjölmiðlar velji út þessa fáu karlmenn sem eru hjúkrunarfræðingar, vilji þeir ræða störf hjúkrunarfræðinga,“ skrifar Helgi, sem segir að jafnrétti sé sjálfsagt en áætlun Íslandsbanka sé „kjánalegt ofstæki.“

Segir bankann ekki vera að beita viðskiptaþvingunum

Mikil umræða hefur skapast um ákvörðun Íslandsbanka í vikunni. Bjarni Benediktsson, fjármálaráðherra og formaður Sjálfstæðisflokksins, sagði að áætlunina koma sér spánskt fyrir sjónir og Sigmundur Davíð Gunnlaugsson, formaður Miðflokksins, spurði Bjarna á þinginu í vikunni hvort það væri ekki hálf óhugguleg þróun að ríkisbanki væri að hlutast til um dagskrá fjölmiðla og mannaráðningar og þar með fjármagni sínu og afli.