Flugfélagið Play ætlar að gefa 1.000 flugmiða á vefsíðu sinni. Samkvæmt orðum forstjóra nýja flugfélagsins, Arnars Más Magnússonar, er hægt að skrá sig strax á vef félagsins, flyplay.com og komast þannig fremst í röðina.
Á vef félagsins kemur fram að miðasala eigi að hefjast strax í þessum mánuði.
Play vill standa fyrir stundvísi, einfaldleika, hagstætt verð og gleði, samkvæmt því sem fram kom í kynningu forstjórans.
„Við ætlum að bjóða upp á hagstæð verð frá fyrsta degi,“ sagði Arnar Már og sagði hann samningagerð hafa gengið vel að undanförnu með það að markmiði.