„Það bendir allt til þess að þetta hafi verið eldsneytisbruni og hafi ekkert haft með rafhlöðuna að gera,“ segir Hjörtur Hafliðason, þjónustustjóri hjá Brimborg, um eldinn sem kom upp í Volvo XC90 bifreið við bensínstöð N1 við Hringbraut í gærdag.
Samkvæmt upplýsingum, sem blaðamaður mbl.is fékk á staðnum, flækti það slökkvistarf að um væri að ræða tengiltvinnbifreið með rafhlöðu. Það gekk engu að síður vel að slökkva eldinn og engin hætta var á ferðum.
Samkvæmt upplýsingum frá slökkviliðinu á höfuðborgarsvæðinu kom eldurinn upp á meðan bifreiðin var á ferð.
Um var að ræða bifreið sem var flutt notuð inn til landsins frá Bandaríkjunum og því ekki í gegnum Brimborg sem er umboðsaðili Volvo á Íslandi.