Rannsókn á tildrögum elds sem kom upp í veiðihúsi við Deildará, sunnan við Raufarhöfn, í gærkvöldi er nú hafin hjá rannsóknardeild lögreglunnar á Akureyri.
Tilkynning barst um eld í húsinu um áttaleytið í gærkvöldi og fór slökkvilið Norðurþings á staðinn. Húsið var mannlaust og mætti mikið eldhaf slökkviliðsmönnum er þeir komu á staðinn.
Óttast var um tíma að eldurinn myndi ná að læsa sig í annað hús í nágrenninu, en unnt reyndist að hindra það.
Að sögn lögreglunnar á Húsavík eru tildrög eldsins enn óljós, en húsið er hins vegar algjörlega ónýtt.