Þingflokkur Sjálfstæðisflokksins afgreiddi í dag úr þingflokknum frumvarp um stuðning til einkarekinna fjölmiðla. Samþykkt Sjálfstæðisflokksins er háð nokkrum fyrirvörum, meðal annars þeim að tekið verði á umfangi Ríkisútvarpsins á auglýsingamarkaði.
Frá þessu var greint í kvöldfréttum RÚV.
Lilja Alfreðsdóttir, mennta- og menningarmálaráðherra, sem leggur frumvarpið fram, sagði í samtali við mbl.is í gærkvöldi að gildistaka frumvarpsins yrði 1. janúar 2020 en það sama kom fram í máli ráðherra í kvöld.
Búið er að tryggja 400 milljónir króna í ríkisfjármálaáætlun fyrir fjölmiðlafrumvarpið.
Bjarni Benediktsson, formaður Sjálfstæðisflokksins, sagði að þingmenn Sjálfstæðisflokksins hefðu fengið nokkrum atriðum frumvarpsins breytt og þannig hefði það verið afgreitt frá flokknum. Helstu áherslurnar þar snúi að umsvifum Ríkisútvarpsins á auglýsingamarkaði.