Riðuveiki staðfest í Skagafirði

Riðuveiki hefur verið staðfest á búi í nágrenni Varmahlíðar í Skagafirði. Riðan greindist í sýni úr kind frá bænum Grófargili í Varmahlíð en á bænum eru nú um 100 fjár. Síðast greindist riða á þessu svæði árið 2019 á bænum Álftagerði. Matvælastofnun vinnur nú að öflun upplýsinga og undirbúningi aðgerða. 

Frétt af mbl.is

Riðuveiki greinist í Skagafirði

Bóndinn hafði samband við Matvælastofnun þar sem kindin sýndi einkenni riðuveiki. Kindin var skoðuð, síðan aflífuð og sýni tekin og send á Tilraunastöð Háskóla Íslands að Keldum þar sem riðuveiki var staðfest.

Búið er í Húna- og Skagahólfi og í því hólfi hefur riðuveiki komið upp á tuttugu búum á undanförnum 20 árum. Þetta er í fyrsta skiptið sem riða greinist á bænum en árið 2016 greindist riða á bænum Brautarholti sem er næsti bær við Grófargil. Riðuveiki hefur komið upp á mörgum bæjum í Varmahlíð í gegnum tíðina og má því segja að um þekkt riðusvæði sé að ræða, að því er segir í tilkynningu frá stofnuninni. 

Þetta er fyrsta tilfelli riðuveiki sem greinist á árinu og í fyrra greindist einnig eitt tilfelli. Fram til ársins 2010 greindist riða á nokkrum bæjum á landinu á hverju ári en engin tilfelli hefðbundinnar riðu greindust á árunum 2011-2014. „Riðan er því á undanhaldi en þetta sýnir að ekki má sofna á verðinum,“ segir í tilkynningu.

• Blogga um frétt