Verulega dregur úr flugi til Íslands

Útlit er fyrir að sætaframboð í flugferðum á Keflavíkurflugvelli verði 25% minna fyrstu þrjá mánuði ársins en sömu mánuði í fyrra. Alls var framboðið um 2 milljónir sæta á fyrsta ársfjórðungi í fyrra en verður að óbreyttu um 1,5 milljónir sæta á fyrsta fjórðungi í ár.

Þetta má lesa úr svari upplýsingafulltrúa Isavia við fyrirspurn Morgunblaðsins. Þróunin í framboðinu frá ársbyrjun 2017 er sýnd á grafinu hér fyrir ofan.

Sé litið til fyrstu tíu mánaða ársins er útlit fyrir að þá verði 5,2 milljónir flugsæta í boði á Keflavíkurflugvelli. Til samanburðar voru 5,4 milljón flugsæti í boði þessa mánuði í fyrra. Það yrði um 4% samdráttur milli ára. Hafa ber í huga að WOW var í fullum rekstri til 28. mars í fyrra.

600 þúsund færri sæti en 2018

Samanlagt er gert ráð fyrir 600 þúsund færri flugsætum fyrstu tíu mánuði ársins en sömu mánuði í fyrra. Munurinn milli 2018 og 2020 er enn meiri. Fyrra árið voru flugsætin 9,9 milljónir, eða 3,1 milljón fleiri en útlit er fyrir að þau verði fyrstu tíu mánuðina í ár. Það er ríflega 30% samdráttur á tveimur árum, að því er fram kemur í Morgunblaðinu í dag.