„Við reiknum með að geta hafið skólastarf í næstu viku, svo framarlega sem það heltast ekki fleiri úr lestinni. Það fór nú einn í sóttkví í dag,“ segir Sævar Þór Helgason, skólastjóri grunnskólans í Hveragerði. Þar í bæ eru hátt í þrjú hundruð manns í sóttkví, flestir starfsmenn og nemendur grunnskólans.

Óhætt er að segja að smit af völdum kórónuveirunnar, dvöl í sóttkví og samkomubann sem gekk í gildi í byrjun vikunnar hafi sett svip sinn á skólastarf víða um land.

Þrír leikskólar eru lokaðir í Reykjavík vegna kórónuveirunnar, Stakkaborg við Stakkahlíð, Laufskálar í Grafarvogi og Nóaborg í Hlíðunum. Þá er Háteigsskóli lokaður vegna þriggja smita meðal starfsmanna. Klettaskóla hefur sömuleiðis verið lokað um óákveðinn tíma vegna smits hjá starfsmanni.

Í Mosfellsbæ hefur einum leikskóla, Hlaðhömrum, verið lokað til miðvikudagsins 25. mars en aðrir leik- og grunnskólar eru opnir með takmörkunum. Ekki hefur komið til lokana í Hafnarfirði, Kópavogi, Garðabæ eða á Seltjarnarnesi vegna kórónuveirunnar.

Allir nemendur og starfsmenn Grunnskóla Húnaþings vestra á Hvammstanga hafa verið settir í sóttkví eftir að starfsmaður þar greindist með kórónuveirusmit. Verður fólkið í sóttkví til 30. mars.

Í Vestmannaeyjum hefur leikskólanum Sóla verið lokað eftir að starfsmaður greindist með veiruna. Samkvæmt niðurstöðum rakningarteymis fara 27 af 29 starfskonum Sóla í sóttkví og nemendur af einum kjarna hans. Auk þess eru þrír kennarar í grunnskóla bæjarins og einn stuðningsfulltrúi í sóttkví.

Tengdar fréttir

Kórónuveiran Covid-19

Heimsfaraldurinn var æfing í seiglu

• Engar aukaverkanir eftir 217 bólusetningar
• „Við þurfum að vera tilbúin“
• Ríkið hafði betur gegn skjólstæðingi Arnars
• Hæstiréttur staðfestir efndaskyldu tveggja hótela

» Fleiri tengdar fréttir