Fólk sem farið hefur í sýnatöku hjá heilsugæslu vegna gruns um kórónuveirusmit á að vera í einangrun þar til niðurstaða sýnatökunnar liggur fyrir. Á þetta benti Ragn­heiður Ósk Er­lends­dótt­ir, fram­kvæmda­stjóri hjúkr­un­ar hjá Heilsu­gæslu höfuðborg­ar­svæðis­ins, á blaðamannafundi almannavarna í dag.

Sagði hún dæmi um að fólk kæmi í sýnatöku í sérstökum sýnatökubíl heilsugæslunnar og Læknavaktarinnar ætlaði sér síðan að sinna erindum að sýnatöku lokinni.

Einungis fólk með einkenni smits fær að fara í sýnatökur heilsugæslunnar, en Ragnheiður sagði á fundinum að fólki sé einnig forgangsraðað með tilliti til sjúkrasögu og þess hvar það starfar. Þannig fái heilbrigðisstéttir og aðrir í framlínustörfum forgang.

Mikið hefur mætt á starfsmönnum heilsugæslustöðva undanfarnar vikur. Um 7.000 símtöl berast heilsugæslunni á hverjum degi auk 500-1000 netspjalla. Sinna flestir starfsmenn heilsugæslustöðva nú upplýsingagjöf.

Ragnheiður benti fólki enn fremur á að hringja ekki ef komast má hjá því. Þannig megi til dæmis útvega sér vottorð um sóttkví á heilsuvera.is og því óþarft að hringja, búi menn svo vel að eiga rafræn skilríki.

Tengdar fréttir

Kórónuveiran Covid-19

Heimsfaraldurinn var æfing í seiglu

• Engar aukaverkanir eftir 217 bólusetningar
• „Við þurfum að vera tilbúin“
• Ríkið hafði betur gegn skjólstæðingi Arnars
• Hæstiréttur staðfestir efndaskyldu tveggja hótela

» Fleiri tengdar fréttir

• Blogga um frétt